ABŞ təhlükəsizliklə bağlı narahatlıqlara görə Qətərdə keçiriləcək U17 Dünya Çempionatından imtina edib.
"USA Today" nəşrinin məlumatına görə, qərar Yaxın Şərqdəki vəziyyətin gərginləşməsi və Qətər yaxınlığındakı sularda gəmilərlə bağlı hadisələrlə əlaqədardır. ABŞ Dövlət Departamenti hazırda Qətərə 3-cü səviyyəli xəbərdarlıq elan edib, yəni vətəndaşlar "silahlı münaqişə riski səbəbindən səyahətləri yenidən nəzərdən keçirməlidirlər". Lakin ABŞ-ın turnirdən çıxması ilə bağlı hələlik rəsmi açıqlama verilməyib.
"Oyunçularımızın və məşqçilərimizin ABŞ-ı Dünya Kubokunda təmsil etmək üçün göstərdikləri hazırlıqdan son dərəcə qürur duyuruq. Təəssüf ki, ABŞ Dövlət Departamentinin 3-cü səviyyəli səyahət məsləhətləri, səfirlik işçiləri və onların ailələri üçün əlaqəli təlimatlar da daxil olmaqla, mövcud şəraitə görə artıq turnirdə iştirak edə bilmirik. Oyunçularımızın və işçilərimizin rifahı həmişə bizim üçün əsas prioritet olacaq", - deyə xəbər agentliyi ABŞ Futbol Federasiyası tərəfindən oyunçulara göndərilən məktubun mətnindən sitat gətirib.
17 yaşadək futbolçular arasında dünya çempionatı 19 noyabr - 13 dekabr tarixlərində Dohada keçiriləcək. FİFA qaydaları turnirdən çıxan komandanın əvəzlənməsinə icazə verir.
