"Dərmanların, məsələn, mətbəxdə və ya vanna otağında düzgün saxlanmaması onların keyfiyyətinə təsir göstərir".
Bu barədə tibb elmləri doktoru, professor, Rusiya Elmlər Akademiyasının müxbir üzvü Olqa Tkaçeva Gazeta.Ru-ya bildirib.
"Dərmanların düzgün saxlanmasına xüsusi diqqət yetirilməlidir. Yaşlı insanlarda unutqanlıq səbəbindən dərmanlar tez-tez masanın üstündə və ya vanna otağında qalır. Yüksək temperatur, rütubət və buxar dərmanların xüsusiyyətlərini tədricən dəyişir. İstənilən dərmanlar təlimatlara uyğun saxlanmasa, yararsız hala düşə, hətta zərərli ola bilər: yüksək rütubət və ya günəşin birbaşa şüaları aktiv maddələri məhv edə bilər", - həkim deyib.
Həmçinin müddəti keçmiş dərmanların, rəngi, qoxusu, konsistensiyası dəyişmiş dərmanların utilizasiyası vacibdir, amma yaşlı insanların çoxu buna diqqət yetirmir.
"Xarab olmuş dərmanları qəbul etməmək üçün ilk yardım çantasını mütəmadi olaraq nəzərdən keçirmək, saxlama müddəti ötmüş dərmanları atmaq vacibdir. Dərmanlar üçün ayrıca şkaf və ya qutu seçin. Dərmanları vanna otağında, mətbəxdə və ya pəncərənin kənarında saxlamayın. Optimal saxlama yeri quru, sərin və işıqdan birbaşa qorunan yerdir. Təlimata uyğun olaraq, onları soyuducuda saxlamaq da olar, amma donmamalarına diqqət yetirmək vacibdir. Həblər sonadək öz qabarcıqlarında və şüşələrində saxlanılmalıdır".
