"Samsung" smartfon istifadəçilərinə yeni və təhlükəli bir virus barədə xəbərdarlıq edilib.
"Landfall" virusu "Samsung" smartfonlarından məlumatları oğurlaya bilər.
"TechCrunch" bildirir ki, kibercasuslar və kiberdələduzlar öz məqsədləri üçün "Landfall" zərərli proqramından istifadə edə bilirlər.
Analitiklərə görə, virus ani mesajlaşma vasitəsilə xüsusi hazırlanmış bir şəkil formatında asanlıqla göndərilir. Maraqlısı odur ki, telefonun sahibindən heç bir qarşılıqlı əlaqə tələb olunmur. Bu isə virusdan qorunmağı çətinləşdirir.
Zərərli proqramın mənbə kodunda flaqman Galaxy S22, S23 və S24 seriyaları, eləcə də bəzi qatlana bilən Galaxy Z modelləri daxil olmaqla, geniş çeşiddə "Samsung" cihazlarına istinadlar var.
"Samsung"un artıq bu kimi halların qarşısını almaq üçün tədbirlər gördüyü bildirilir. Lakin şirkət məsələ ilə bağlı təfərrüatları açıqlamayıb.
Zərərli proqram təminatının tərtibatçısı və hücumların dəqiq əhatə dairəsi məlum deyil.
