21-22 noyabr 2024-cü il tarixində Dağlıq Şirvan Regional Gənclər və İdman İdarəsinin təşkilatçılığı ilə Lənkəran şəhərinə "Gənclər paytaxtı" çərçivəsində təşkil edilən regionun fəal gənclərinin ekskursiyasının ikinci günündə gənclər Həzi Aslanovun ev-muzeyində olublar.
Muzeyin əməkdaşları II Dünya müharibəsinin igid sərkərdəsi, ölümü ilə ölümsüzlüyə qovuşan Həzi Aslanovun mənalı həyatı, şərəfli döyüş yolu və qəhrəmanlığı barədə gənclərə məlumat verib. Belə ki, muzey fəaliyyətə başlayanda 2 otaqlı olub. 1983-cü ildə otaqların sayı 5-dək artırılıb. Birinci otaq qəhrəmanın doğulub boya-başa çatdığı mühiti əks edir. Buradakı eksponatlar arasında anasının işlətdiyi ev əşyaları da var, bacısı Asiya Aslanova tərəfindən muzeyə hədiyyə edilib. Növbəti otaqda yerləşən eksponatlar Həzinin 1924–1940-cı illərdə Bakıda və Leninqradda hərbi məktəblərdə təhsil aldığı dövrdən, eləcə də Finlandiya döyüşlərindən soraq verir. Moskva və Stalinqrad uğrunda gedən döyüşlərə həsr olunmuş 3-cü otaqda qəhrəmanın şəxsi əşyaları yerləşir. Sonrakı otağın eksponatları general-mayorun 1944–1945-ci illərdə göstərdiyi misilsiz hünərdən danışır. Xatirə zalı adlanan 5-ci otaqda isə muzeyə verilən müxtəlif hədiyyələr, qəhrəmanın həlak olduğu gün əynində olan hərbi paltarları, xatirə əşyaları, albom və kitabları qorunur.
Sonda gənclər muzeyin xatirə dəftərinə muzeylə bağlı təəsuratlarını qeyd edib, əməkdaşları ilə birlikdə xatirə şəkilləri çəkdiriblər.
#AZEidman #AZEgənclər #birkimibirlikdə
