ABŞ-a Rusiya dizeli daşıyan üç tankerdən ikisinin sanksiyalar altında olduğu üzə çıxıb. Bu vəziyyət Vaşinqton üçün hüquqi və siyasi problem yarada bilər.
“Financial Times” nəşrinin məlumatına görə, “Talisman” tankeri ABŞ, Avropa İttifaqı və Böyük Britaniyanın, “Leruo” isə Böyük Britaniya, Aİ və Kanadanın sanksiyalarına məruz qalıb.
ABŞ Konqresindəki demokratlar və respublikaçı senator Tom Tillis Rusiya məhsullarının idxalına yardım edən Amerika şirkətlərinin araşdırıla biləcəyi barədə xəbərdarlıq ediblər. Qanunvericilər bildiriblər ki, ABŞ qanunlarını pozaraq Rusiya dizeli idxal edən şirkətlər cinayət və mülki məsuliyyətlə üzləşə bilərlər.
Amerikalı ekspert Yuliya Boquslavskayanın fikrincə, demokratlar noyabrın 3-də keçiriləcək aralıq seçkilərdə qalib gəlsələr, müqavilə bağlamış şirkətlərə qarşı məhkəmə iddiaları vasitəsilə Rusiya ilə dizel sazişini pozmağa çalışa bilərlər.
Rusiya dizelinin ABŞ-a satışına oktyabrın 9-da Donald Trampla Vladimir Putinin danışıqlarından sonra imkan yaranıb. Rusiya prezidenti razılaşmalar nəticəsində dünya bazarında dizel qiymətlərinin 5-6 faiz azaldığını bildirib.
İlk gəmilərin gələn həftə ABŞ-a çatacağı, dördüncü tankerin isə oktyabrın 28-də yola düşəcəyi gözlənilir. Dmitri Peskov gələcəkdə tədarüklərin müntəzəm aparılacağını deyib.
ABŞ-ın energetika naziri Kris Rayt sazişi Moskvanı Ukraynadakı münaqişəni dayandırmağa təşviq edən iqtisadi vasitə adlandırıb. Onun sözlərinə görə, razılaşma eyni zamanda dünya bazarlarına dizel tədarükünə kömək edir.
