Saxta sənədlərlə Belarus ərazisindən keçməklə Ermənistandan Rusiyaya 39 mindən çox qızılgülün gətirilməsinin qarşısı alınıb.
Bu barədə "Rosselxoznadzor" məlumat yayıb.
Məlumata görə, Rusiyaya gətirilməsi qadağan edilmiş 39,2 min çiçəyi daşıyan avtomobil Smolensk gömrüyündə saxlanılıb.
Belarus vətəndaşının idarə etdiyi nəqliyyat vasitəsi Minsk vilayətindən Moskvaya gedərkən yük bölməsinə baxış zamanı fitosanitar və malı müşayiət edən sənədləri olmayan çiçəklər aşkar edilib. Markalanma etiketlərinin qorunub saxlanılmış hissələrində onların Ermənistan mənşəli olduğu göstərilib.
"Rosselxoznadzor"un ərazi idarəsinin qərarı ilə qaçaqmalçılıq yolu ilə gətirilən qızılgül partiyası iyulun 23-də məhv edilib. Daşıyıcı inzibati məsuliyyətə cəlb olunub.
Xatırladaq ki, Ermənistandan Rusiyaya çiçək tədarükü, eləcə də onların Rusiya ərazisindən tranziti 2026-cı il mayın 22-dən qadağan edilib.
