İranın “Buşehr” atom elektrik stansiyasının (AES) ərazisinə reaktiv mərmi düşüb.
Bu barədə İranın Atom Enerjisi Təşkilatı (İAET) məlumat yayıb.
"Düşmən tərəfindən “Buşehr” AES-in meydançasına atılan mərmi nə maddi-texniki ziyana, nə də insan tələfatına səbəb olub", - deyə təşkilatdan bildirilib.
Qeyd edilib ki, zərbə çərşənbə axşamı yerli vaxtla saat 19:00 radələrində (Bakı vaxtı ilə 19:30) endirilib. İAET-dən vurğulanıb ki, baş verənlər bütün beynəlxalq normaların pozulmasıdır.
“Nüvə obyektlərinə hücum bütün region, o cümlədən Fars körfəzi ölkələri üçün düzəlməz nəticələrə səbəb ola bilər”, deyə təşkilatdan əlavə edilib.
Martın 15-də Beynəlxalq Atom Enerjisi Agentliyinin (BAEA) baş direktoru Rafael Qrossi bəyan etmişdi ki, Yaxın Şərqdəki münaqişə səbəbindən hazırda "Buşehr" AES ətrafındakı vəziyyət əsas narahatlıq doğuran məsələdir.
Buşəhr atom elektrik stansiyası İranda və bütün Yaxın Şərqdə bu tipli ilk obyektdir. O, Buşehr şəhərinin yaxınlığında yerləşir. AES-in tikintisinə 1975-ci ildə başlanılıb, lakin onu sənaye istismarına yalnız 2013-cü ildə vermək mümkün olub. Bu, ən böyük Rusiya-İran layihəsidir.
