Çili sahillərində xalq arasında “Qiyamət günü balığı” adlandırılan nəhəng siyənək kralı aşkarlanıb.
Bu barədə “Daily Mail” məlumat yayıb.
Uzunluğu təxminən beş metr olan nadir dəniz canlısı oktyabrın 20-də Antofaqasta əyalətinin Mexilyones şəhərinin sahilinə çıxıb.
Qeyri-adi tapıntı Cənubi Amerikada son vaxtlar müşahidə olunan seysmik aktivlik səbəbindən yerli sakinlər arasında narahatlıq yaradıb.
Oktyabr ayında Panama sahillərində, eləcə də Peru, Ekvador və Çilinin özündə güclü yeraltı təkanlar qeydə alınıb. Sosial şəbəkələrin bəzi istifadəçiləri dərinliklərdə yaşayan bu canlının üzə çıxmasının yeni zəlzələ barədə xəbərdarlıq ola biləcəyini ehtimal ediblər.
Siyənək krallarına insanlarla qarşılaşmaq olduqca nadir hallarda nəsib olur, çünki onlar vaxtlarının böyük hissəsini 900 metrdən çox dərinlikdə keçirirlər. Bəzi ölkələrdə bu balıqların okean səthinə yaxın görünməsinin dağıdıcı təbiət hadisələrindən əvvəl baş verdiyinə dair inanc mövcuddur.
Yapon geoloqu Kiyosi Vadatsumi daha əvvəl dərinliklərdə yaşayan balıqların tektonik proseslərə reaksiya verə biləcəyi ehtimalını irəli sürüb. Lakin siyənək krallarının görünməsi ilə yaxınlaşan zəlzələlər arasında əlaqəni təsdiqləyən inandırıcı elmi sübutlar yoxdur.
