Aprelin 17-də “Zəkaların mübarizəsi” olimpiadası çərçivəsində Qarabağ Regional Təhsil İdarəsinin tabeliyində olan ümumi təhsil müəssisələrinin şagirdləri arasında regional şahmat turniri keçirilib.
Tədbirdə idarənin müdir müavini Ruslan Rzayev , tədrisin keyfiyyəti sektorunun müdiri Elməddin Bəşirov, digər struktur bölmə rəhbərləri, müəllimlər və şagirdlər iştirak ediblər.
Həyata keçirilən şahmat turnirində Ağcabədi, Ağdam, Bərdə, Xankəndi, Şuşa, Füzuli və Tərtər rayonları üzrə ümumilikdə 7 komanda iştirak etmişdir. Mübarizənin nəticələrinə əsasən, Ağcabədi rayonunu təmsil edən "Ağcabədi" şahmat komandası birinci yerə layiq görülərək respublika mərhələsinə vəsiqə qazanmışdır.
Qeyd edək ki, Heydər Əliyev Fondu və Elm və Təhsil Nazirliyinin birgə əməkdaşlığı ilə həyata keçirilən "Zəkaların mübarizəsi" olimpiadasının əsas məqsədi, ümumtəhsil müəssisələrində təhsil alan şagirdlərdə fənlərin dərindən öyrənilməsinə marağın artırılması, onların dünyagörüşünün genişləndirilməsi, sağlam rəqabət mühitinin formalaşdırılması, müxtəlif regionlardan olan şagirdlər arasında dostluq əlaqələrinin qurulması və ümumilikdə, öyrənməyə təşviq etməkdən ibarətdir.
#EduAz #MÜTDA #ARTİ #ZəkalarınMübarizəsi #Olimpiada
