Azərbaycanda mənzillərin təkrar bazarında bahalaşma səngiyib. Rəsmi statistikaya görə, 2026-cı ilin birinci rübündə 2025-ci ilin eyni dövrünə nisbətən ilkin mənzil bazarında qiymətlər 13.1 faiz artsa da, təkrar bazarda artım 8.1 faiz təşkil edib.
Halbuki xeyli müddətdir ki, mənzil bazarında hər iki növ üzrə artım eyni səviyyədə olurdu, hətta bəzən təkrar bazarda qiymətlərin daha çox artdığı müşahidə edilirdi.
Maraqlıdır, bəs təkrar bazarda qiymət artımının səngiməsi nə ilə bağlıdır?
Daşınmaz əmlak üzrə ekspert Elnur Azadov məsələni Baku TV-yə belə şərh edib: "Köhnə yaşayış fondu bazara uyğun qiymət formalaşdırıb - alıcılıq dinamikasına və alıcılıq qabiliyyətinə görə. Amma ilkin bazarda, yəni tikinti şirkətlərinin özlərinin satdıqları halda bunlar arasında rəqabət çox az olduğuna görə satışa çıxan əmlakların orta hesabla qiymətləri 10-12 faiz, bəzi hallarda 15 faiz real bazar qiymətindən yüksəkdir".
Azərbaycan Qiymətləndiricilər Cəmiyyətinin sədri Vüqar Oruc isə deyir ki, təkrar bazarda qiymət artımının səngiməsi köhnə mənzillərə tələbatın azalması ilə bağlıdır: "Əhalinin seçimində yeni tikililər təqribən 50-60 faiz aralığında daha çox üstünlük qazanıb. Bu, yeni tikililərin istismar müddətinin çox olmasından, köhnə tikililərin əksəriyyətinin öz istismar müddətini başa vurmasından, eyni zamanda ipoteka kreditləşməsi üçün daha çox yeni tikililərə müraciət edilməsindən irəli gəlir".
