Daxili keyfiyyətin təmin edilməsi və inkişaf istiqamətində həyata keçirilən tədbirlər icrası məqsədi ilə yaradılmış məktəb daxili keyfiyyət və özünüqiymətləndirmə komissiyasalarının üzvləri ilə görüşlər keçirilir.
Gəncə-Daşkəsən Regional Təhsil İdarəsinin tabeliyində fəaliyyət göstərən yerli təhsil sektorları tərəfindən ümumtəhsil müəssisələrində təhsilin keyfiyyətinin yüksəldilməsi, daxili keyfiyyət təminatı sisteminin təkmilləşdirilməsi və institusional inkişafın gücləndirilməsi istiqamətində həyata keçirilən tədbirlər davam etdirilir.
Bu çərçivədə təhsil müəssisələrində fəaliyyət göstərən daxili keyfiyyət təminatı və özünüqiymətləndirmə komissiyalarının 2025–2026-cı tədris ilinin birinci yarımilliyi üzrə hesabatlarının dinlənilməsi təşkil olunur.
Hesabatlar zamanı məktəblərdə təlim nəticələrinin yüksəldilməsi, şagird nailiyyətlərinin artırılması, tədris prosesinin səmərəliliyinin təmin edilməsi, həmçinin idarəetmədə şəffaflığın və hesabatlılığın gücləndirilməsi istiqamətində həyata keçirilmiş fəaliyyətlər geniş şəkildə təqdim edilir. Eyni zamanda komissiyalar tərəfindən aparılmış monitorinqlərin, təhlillərin və qiymətləndirmələrin nəticələri müzakirə olunur, mövcud vəziyyət hərtərəfli təhlil edilir.
Hesabatların dinlənilməsi prosesində məktəbdaxili nəzarət mexanizmlərinin daha da təkmilləşdirilməsi, təhsil keyfiyyətinin yüksəldilməsi, aşkar edilmiş çatışmazlıqların aradan qaldırılması və növbəti mərhələ üçün prioritet fəaliyyət istiqamətlərinin müəyyənləşdirilməsi əsas diqqət mərkəzində saxlanılır.
Görülən tədbirlər ümumtəhsil müəssisələrində tədris prosesinin daha səmərəli təşkili, təhsil nəticələrinin yaxşılaşdırılması və məktəblərin institusional inkişafının təmin olunmasına xidmət edir.
