Rumıniya alimlərinin araşdırmasına görə, D vitamini çatışmazlığı qrip və COVID-19-un daha ağır hallarına yol aça bilər.
Tədqiqatın nəticələri "Nutrients" nəşrində dərc olunub.
Tədqiqatçılar D vitamininin virus infeksiyalarının inkişafındakı roluna həsr edilən klinik sınaqların və meta-analiz məlumatlarını təhlil ediblər.
Elm adamlarının qənaətinə görə, bu vitaminin aşağı səviyyəsi çox vaxt COVID-19-un daha ağır nəticələri ilə əlaqələndirilir.
Müəlliflər qeyd edirlər ki, ən çox nəzərəçarpan təsir ilkin D vitamini çatışmazlığı olan xəstələrdə müşahidə olunub. Bu göstəricinin normal səviyyədə olduğu insanlarda, ümumiyyətlə heç bir əhəmiyyətli əlavə fayda müşahidə edilməyib.
D vitamini çatışmazlığı ilə COVID-19-un uzun müddət davam etməsi riski arasında mümkün əlaqə də müzakirə olunur, lakin səbəb-nəticə əlaqəsi hələ sübut edilməyib.
Alimlər xatırladıblar ki, yağlı balıq növləri (qızılbalıq, skumbriya, tuna) və yumurta bu vitaminlə zəngindir.
