Dünya Bankı illərlə davam edən vətəndaş müharibəsindən sonra Suriyanın tam şəkildə yenidən qurulmasının dəyərini 216 milyard dollar qiymətləndirir.
Bu barədə "abc news" Dünya Bankının hesabatına istinadən məlumat yayıb.
Sənəd 2011-ci ildən 2024-cü ilə qədər toplanmış məlumatlara əsaslanır.
Qeyd edilir ki, münaqişə Suriyanın müharibədən əvvəlki kapitalının təxminən üçdə birinə ziyan vurub, infrastruktura, yaşayış və qeyri-yaşayış binalarına birbaşa fiziki ziyan 108 milyard dollar dəyərində qiymətləndirilir.
Ən çox zərər çəkmiş sektor isə ümumi zərərin 48 faizini təşkil edən və 52 milyard dollara bərabər olan infrastruktur olub.
İtirilmiş və zədələnmiş aktivlərin ümumi dəyərinin 140 milyard dollardan 345 milyard dollara qədər olduğu təxmin edilir və 216 milyard dollar "ən konservativ qiymətləndirmə" kimi təsvir edilir.
Ən böyük zərər Hələb vilayətinə və Dəməşqin ətrafındakı kəndlərə, münaqişənin ilk illərində ən şiddətli döyüşlərin getdiyi bölgələrə dəyib.
Dünya Bankının məlumatına görə, təxmini yenidənqurma xərcləri Suriyanın 2024-cü ildəki ÜDM-dən on dəfə çoxdur.
