Bəzi tikinti materialları insan sağlamlığı üçün zərərlidir.
Bunu açıqlamasında inşaat üzrə ekspert Elnur Azadov bildirib.
O, qeyd edib ki, zərərli inşaat materiallarından ən təhlükəlisi istifadəsi dayandırılan asbestdir: "Lakin bununla belə, təəssüf ki, hələ də çox istifadə olunan zərərli inşaat materialları mövcuddur. Təhlükəli məhsullardan biri də mebel istehsalında tanıdığımız formaldehiddir. Ondan mətbəx mebeli və digər mebellərdə yapışdırıcı kimi istifadə edilir".
Elnur Azadov əlavə edib ki, xüsusən uşaqlar üçün təhlükəli hesab olunan inşaat mallarından biri də müəyyən maddə və materiallardan istifadə olunmaqla hazırlanmış döşəmələrdir.
Ekspert bildirib ki, istehlakçılar inşaat materialları seçərkən, tərkibi ilə tanış olmurlar.
Qeyd edək ki, ölkəmizdə tikinti sahəsində qanunvericiliyin təkmilləşdirilməsi istiqamətində yeni tədbirlər paketi hazırlanır. Yeni mexanizmlər tikintiyə nəzarət və təhlükəsizlik standartlarının dəqiqləşdirilməsini nəzərdə tutur. Tikinti ərazilərində ekoloji və radioloji risklərin qiymətləndirilməsi və idarə olunması üçün hüquqi baza yaradılacaq. Sağlamlığa zərərli tikinti materiallarının istifadəsinə məhdudiyyətlə bağlı qadağalar gücləndiriləcək.
