Şənbə və bazar günlərində vətəndaşların bank kartlarından 41048 manat oğurlanıb.
Bu barədə DİN-in Mətbuat xidməti məlumat yayıb.
Bildirilib ki, aprelin 12-də və 13-də ayrı-ayrı vətəndaşların müxtəlif kiber üsulla 11100, 10283, 4900, 2537, 2520, 2183, 1500, 900, 711, 530, 500, 480, 425, 393, 387, 381, 330, 142, 120, 100, 100, 96, 95, 68, 50, 50, 50, 50, 20, 19, 15, 13 manat pul vəsaitləri bank kartlarından oğurlanıb.
Kart oğurluqlarının qarşısını almaq üçün siz hansı tədbirlərin görülməsini vacib hesab edirsiniz?
Sfera.az-a açıqlama verən İT mütəxəssis Fərid Kazımov bu məsələ ilə bağlı əsas təhlükəsizlik tədbirlərindən birinin əlavə bank kartı hesabının açılması olduğunu bildirib. Onun sözlərinə görə, gündəlik ödənişlər məhz bu kart üzərindən həyata keçirilməlidir:
"Məsələn, əgər bir şəxsin maaş kartına yüksək məbləğdə vəsait daxil olursa, həmin məbləği hissə-hissə əlavə karta köçürmək daha məqsədəuyğundur. Bu halda vətəndaş öz maliyyə təhlükəsizliyini qismən təmin edə bilər. Əgər ikinci kart oğurlanarsa və ya dələduzluq halları baş verərsə, əsas vəsaitə zərər dəyməyəcək.
Digər mühüm məsələ şəxsi məlumatların heç bir halda paylaşılmamasıdır. Bütün təhlükəsizlik tədbirlərinə baxmayaraq, cinayətkarlar daim yeni üsullar axtarırlar. Lakin bu cür qabaqlayıcı tədbirlərlə baş verə biləcək oğurluqların məbləğini azalda bilərik. Bəzən vətəndaşlara müxtəlif nömrələrdən zənglər daxil olur və onlara xüsusi suallar verilir. İnsanlar bu kimi hallarda son dərəcə ehtiyatlı olmalı və bu zənglərə əsla inanmamalıdırlar".
Mütəxəssis bildirib ki, aidiyyəti qurumlar tərəfindən maarifləndirici xarakter daşıyan xüsusi bir platforma yaradılmalıdır. Bu tətbiq vasitəsilə vətəndaşlar dələduzluq halları barədə mütəmadi məlumatlandırılmalı və bu kimi hadisələrin qarşısının alınması üçün zəruri biliklərlə təmin olunmalıdırlar.
