Milli Məclisin deputatı Novruzəli Aslanov növbəti dəfə İsmayıllı rayonunda vətəndaşlarla görüşüb.
aia.az xəbər verir ki, 03 aprel tarixində keçirilən görüş rayonun İvanovka kəndində baş tutub. Deputat ilk öncə kənddə fəaliyyət göstərən kitabxanada və tarix-diyarşünaslıq muzeyində olub. Daha sonra yerli kolxozun inzibati binasında vətəndaşların qəbulu keçirilib. Novruzəli Aslanov görüş zamanı vətəndaşlar tərəfindən qaldırılan sosial yönümlü məsələləri və şəxsi müraciətləri qeydə alaraq onların həlli məqsədilə müvafiq addımların atılacağını bildirib.
Görüşün gedişində deputat həmçinin 01 aprel 2025-ci il tarixində Ölkə Prezidenti cənab İlham Əliyev tərəfindən İsmayıllı rayonunun İvanovka kəndində əkin sahələrinin suvarma suyu ilə təminatının yaxşılaşdırılmasına dair tədbirlər haqqında Sərəncamın imzalandığını diqqətə çatdırıb. Qeyd olunub ki, Sərəncama əsasən kəndin 1250 hektar əkin sahəsinin suvarma suyu ilə təminatının yaxşılaşdırılması üçün Azərbaycan Respublikası Prezidentinin ehtiyat fondundan ilkin olaraq 5 milyon manat ayrılması nəzərdə tutulub.
Deputat Novruzəli Aslanovun keçirdiyi görüşdə iştirak edən kənd sakinləri Ölkə Prezidenti cənab İlham Əliyevə və Birinci vitse-prezident Mehriban xanım Əliyevaya göstərilən diqqət və qayğıya görə minnətdarlıqlarını bildiriblər. 
