Şəki şəhərində Zəfər Gününə həsr olunmuş konsert proqramı təşkil edildi.
Noyabrın 8-də ölkənin hər bir yerində olduğu kimi Zəfər Günü Şəki şəhər B.Vahabzadə adına mədəniyyət və istirahət parkında da xüsusi konsert proqramı ilə qeyd edilib.
Konsert proqramından əvvəl vətənpərvərlik, sülh əmin-amanlıq və bütöv Azərbaycan mövzularına həsr olunmuş rəsm sərgisinə baxış keçirilib. Konsertin əvvəlində canlarını ölkəmizin ərazi bütövlüyü və suverenliyi uğrunda qurban vermiş şəhidlərimizin müqəddəs ruhları bir dəqiqəlik sükutla yad edilib, Azərbaycanın tarixinə qızıl hərflərlə yazılmış Zəfər Günü barədə tamaşaçılara məlumat verilib. Vətən Müharibəsində qabaqcıl hərbi texnika və texnologiyalardan məharətlə istifadə edən Azərbaycan Ordusunun dünya hərb tarixində yeni səhifə yazması barədə söhbət açılıb. Möhtəşəm qalibiyyətin əldə edilməsində müasir hərbi biliklərə və döyüş bacarıqlarına sahib, qəhrəman Azərbaycan əsgər və zabitlərinin mühüm pay sahibi olduğu diqqətə çatdırılıb.
Daha sonra Zəfər Gününə həsr olunmuş Şəki-Zaqatala Regional Mədəniyyət İdarəsinin tabeliyindəki Şəkidə yerləşən Uşaq incəsənət, musiqi məktəblərinin birgə hazırladığı konsert proqramı təqdim edilib.
