ABŞ Senatına təqdim edilən yeni qanun layihəsi "Mercedes-Benz" şirkətinin ölkədəki fəaliyyətinə təsir göstərə biləcək məsələləri gündəmə gətirib.
Bu barədə BILD nəşri məlumat yayıb.
Layihəyə əsasən, çinli investorların 15 faizdən artıq pay sahibi olduğu avtomobil istehsalçılarının məhsullarının ABŞ-yə idxalı, ölkədə istehsalı və satışı qadağan oluna bilər. Bu səbəbdən "Mercedes-Benz" də müzakirə olunan şirkətlər sırasında göstərilir.
Şirkətin səhmlərinin təxminən 10 faizi Çinin BAIC avtomobil istehsalçısına, daha 10 faizə yaxını isə çinli iş adamı Li Şufuya məxsusdur. Bununla belə, "Mercedes-Benz" hesab edir ki, sözügedən qanun layihəsi ona şamil olunmamalıdır. Şirkət bildirir ki, ayrı-ayrı çinli səhmdarların heç biri 10 faizdən çox paya malik deyil və onlar Müşahidə Şurasında təmsil olunaraq idarəetmə qərarlarına təsir göstərmirlər.
Bundan əlavə, "Mercedes-Benz" ABŞ iqtisadiyyatı üçün əhəmiyyətini də vurğulayıb. Şirkətin məlumatına görə, ölkədə təxminən 160 min iş yeri konsernin fəaliyyəti ilə əlaqəlidir. Bunlara Taskalusa (Alabama ştatı) və Çarlstonda (Cənubi Karolina ştatı) yerləşən istehsal müəssisələri də daxildir.
Qeyd olunur ki, ABŞ "Mercedes-Benz" üçün satış həcminə görə ikinci ən böyük bazardır. Yeni qanun layihəsi GPS, Wi-Fi və mobil rabitə sistemləri ilə təchiz olunan bağlantılı avtomobilləri əhatə edir. Respublikaçı senatorlar bu avtomobillərdən əldə olunan məlumatların Çin hökumətinin əlinə keçə biləcəyi ehtimalından narahat olduqlarını bildirirlər.
Məlumata görə, Çin tədarükçüləri ilə sıx əməkdaşlıq edən "Volkswagen" və "BMW" də qanun layihəsinin mümkün təsirlərinə məruz qala biləcək şirkətlər arasında göstərilir.
