Mühasiblərin bilik və bacarıqlarının diaqnostik qiymətləndirilməsi keçirilib
- - - - -
Sentyabrın 30-da Mərkəzi Aran Regional Təhsil İdarəsinin strukturuna daxil olan Maliyyə-iqtisadiyyat sektorunda və rayon (şəhər) üzrə təhsil sektorlarının nəzdində fəaliyyət göstərən mərkəzləşdirilmiş mühasibatlıqda mühasib vəzifələrində çalışan şəxslərin bilik və bacarıqlarının diaqnostik qiymətləndirilməsi imtahanı keçirilib.
Mingəçevir şəhər R.Muradov adına Texniki humanitar liseydə keçirilən imtahanda 132 nəfər şəxs iştirak edib.
İmtahan zamanı mühasiblərə 70 dəqiqə müddətində müvafiq vəzifə və məntiqi təfəkkürünün yoxlanılması üzrə 35 sual təqdim olunub.
Mərkəzi Aran Regional Təhsil İdarəsinin müdir müavini Cavad Cavadov və struktur bölmə rəhbərləri keçirilən imtahanın gedişatını izləyiblər.
Diaqnostik qiymətləndirmənin məqsədi mühasib vəzifəsində çalışan şəxslərin bilik və bacarıq səviyyələrinin müəyyənləşdirilməsi, eləcə də qiymətləndirmənin nəticəsi əsasında inkişafyönümlü təlimlərə cəlb edilməsidir.
Qeyd edək ki, yaxın günlərdə ümumi təhsil müəssisələrində çalışan tədris (təlim-tərbiyə) işləri üzrə direktor müavinlərinin və eyni zamanda məktəbəqədər təhsil müəssisələrinin müdirlərinin də biliyinin diaqnostik qiymətləndirilməsi imtahanın keçirilməsi nəzərdə tutulur.
