İsrailin xarici işlər naziri Gideon Saar Suriyanın bölünməsinə çağırış edib.
Nazir Brüsseldə keçirilən Avropa İttifaqı Xarici İşlər Nazirləri toplantısında Suriyada administrasiya dəyişikliyi ilə bağlı danışıb.
Saar Suriyadakı yeni administrasiyanı “terrorçu” elan edərək hədəfə alıb:
"Suriyada hökumət dəyişikliyi ilə bağlı söhbətlər eşidirəm. Mənə görə bu gülüncdür. Suriyada yeni hökumət İdlibdən Dəməşqi zorla ələ keçirmiş cihadçı islamçı terror qruplaşmasıdır. İslamçılar gözəl danışa bilər, amma 1979-cu ildə İslam İnqilabı başlayanda İran rejimi də belə danışırdı. Yeni liderin kim olduğunu hamı bilir."
Saar hazırkı hökumətin bölgədəki kürdlərə zərər verdiyini və nusayrilərdən qisas aldığını iddia edərək, Suriyanı parçalamağa çağırıb.
O, problemin həllinin federal quruluşdan keçdiyini əsas gətirib: “Sabit Suriya ancaq müxtəlif muxtariyyətləri özündə birləşdirən və müxtəlif həyat tərzinə hörmət edən federal Suriya ola bilər”.
