İş yerində səhvlərini etiraf etmək qadınlar üçün kişilərlə müqayisədə daha çətin ola bilər. Bu fərq xüsusilə kollektivdə kişilərin üstünlük təşkil etdiyi mühitlərdə nəzərə çarpır. Səbəb isə cəza qorxusundan çox, həmkarların gözündə nüfuzunu və peşəkarlığını itirmək narahatlığı ola bilər.
Bu barədə "Frontiers in Organizational Psychology" jurnalında dərc olunan araşdırmada bildirilib.
Böyük Britaniyanın maliyyə sektorunda çalışan 1400-dən çox əməkdaş arasında keçirilən sorğu zamanı iştirakçılardan işdə buraxdıqları səhvləri etiraf etməyə münasibətləri, cəzalandırılmaqla bağlı gözləntiləri və səhvlərdən öyrənmək imkanları barədə soruşulub.
Nəticələr göstərib ki, kişilərin kollektivin ən azı 75 faizini təşkil etdiyi iş yerlərində qadınlar səhvlərini etiraf etməkdə özlərini daha narahat hiss edir, yanlışlıqları öyrənmək fürsəti kimi daha az qiymətləndirirlər. Yeddi ballıq şkala üzrə qadınlar səhvlərini etiraf etmək rahatlığını orta hesabla 5,46, kişilər isə 5,94 balla qiymətləndiriblər. Səhvlərdən öyrənmək imkanına verilən qiymət qadınlarda 4,20, kişilərdə isə 4,54 bal olub.
Kişilərin sayının az olduğu kollektivlərdə isə bu fərq demək olar ki, aradan qalxıb. Belə mühitlərdə qadınların səhvlərə münasibəti kişilərlə müqayisədə eyni dərəcədə müsbət, bəzi hallarda isə daha müsbət olub.
Maraqlıdır ki, qadınlar səhvlərinə görə rəsmi cəzaya məruz qalacaqlarını kişilərdən daha çox düşünmürlər. Tədqiqat müəllifləri hesab edirlər ki, əsas problem qeyri-rəsmi təzyiqlə bağlı ola bilər: qadınlar səhv etdikdən sonra daha az bacarıqlı hesab olunacaqlarından və peşəkarlıqlarının şübhə altına alınacağından ehtiyat edə bilərlər.
Araşdırma müəlliflərinin fikrincə, belə mühit yalnız əməkdaşlara deyil, şirkətlərə də zərər vurur. İnsanlar səhvlərini gizlətməyə çalışdıqda təşkilatlar həmin təcrübədən nəticə çıxarmaq, iş proseslərini təkmilləşdirmək və yeniliklərə nail olmaq imkanlarını itirirlər.
Tədqiqatçılar vəziyyəti dəyişmək üçün rəhbərlərin öz səhvlərini açıq etiraf etmələrini və bunu peşəkar inkişafın bir hissəsi kimi təqdim etmələrini tövsiyə edirlər. Xüsusilə kişilərin üstünlük təşkil etdiyi kollektivlərdə rəhbərlərin bu cür davranışı əməkdaşların səhvlərini daha rahat etiraf etməsinə kömək edə bilər.
Tədqiqatçılar xəbərdarlıq edirlər ki, səhv etməkdən daim çəkinmək uzun müddətdə peşəkar biliklərə, özünəinam və karyera yüksəlişinə təsir göstərə bilər. Bu fərqlər qabiliyyətlərdən deyil, insanların öz səhvlərindən öyrənmək üçün bərabər imkanlara malik olmamasından qaynaqlana bilər.
