Koreya Xalq Demokratik Respublikası (KXDR) Şərq dənizi istiqamətində ballistik raket buraxıb. Raket 700 kilometrdən çox məsafə qət edib.
Bu barədə “Yonhap” agentliyi Koreya Respublikası Silahlı Qüvvələrinin Qərargah Rəisləri Komitəsinə istinadən məlumat yayıb.
Bildirilib ki, raket oktyabrın 3-də saat 06:30 radələrində (Bakı vaxtı ilə 01:30) KXDR-in Vonsan bölgəsindən buraxılıb. Seulun məlumatına görə, buraxılışla bağlı ABŞ və Yaponiya ilə kəşfiyyat məlumatları mübadiləsi aparılır.
Koreya Respublikası Prezident Administrasiyasının Milli Təhlükəsizlik İdarəsi hadisə ilə əlaqədar təcili müşavirə keçirib. Rəsmilər buraxılışın təhlükəsizliyə mümkün təsirini qiymətləndirib və silahlı qüvvələrin cavab tədbirlərinə hazırlığını yoxlayıblar.
Seul KXDR-in ballistik raket buraxılışlarının BMT Təhlükəsizlik Şurasının qətnamələrini pozduğunu bildirərək Pxenyana belə addımları dayandırmaq çağırışı edib.
Qeyd edək ki, KXDR sonuncu oxşar raket buraxılışını sentyabrın 20-də həyata keçirib.
