Bu ilin yanvar-iyul aylarında gecikdirilmiş 456 min manatdan çox sosial xarakterli ödənişin işçilərə ödənilməsi təmin olunub, işdən qanunsuz çıxarılmış 63 nəfər isə əvvəlki işinə bərpa edilib.
Bu barədə Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti məlumat yayıb.
Bildirilib ki, qurum tərəfindən aparılan araşdırmalar zamanı işəgötürənlər tərəfindən 456 049 manat məbləğində vəsaitin ödənilməsinin gecikdirildiyi müəyyən olunub. Görülən tədbirlər nəticəsində həmin vəsaitin işçilərə ödənilməsi təmin edilib. Ödənilən vəsaitin 91 faizini əməkhaqqı, 9 faizini isə zərərə görə ödənc, müavinət və kompensasiyalar təşkil edib.
Bundan əlavə, müraciətlərin araşdırılması zamanı 63 işçinin əmək müqaviləsinə qanunvericiliyin tələbləri pozulmaqla xitam verildiyi aşkarlanıb. Xidmətin müvafiq tədbirləri nəticəsində həmin şəxslər əvvəlki işlərinə bərpa olunublar.
