Maqnit qasırğaları sağlam insanlar üçün birbaşa təhlükə yaratmasa da, hipertoniya və ürək-damar xəstəliklərindən əziyyət çəkən şəxslərin vəziyyətini pisləşdirə bilər.
Bu barədə terapevt və kardioloq Andrey Kondraxin "Aif.ru"ya açıqlamasında bildirib.
Həkimin sözlərinə görə, geomaqnit pozuntuları insanın orqan və toxumalarına birbaşa təsir göstərmir. O qeyd edib ki, nümunə kimi MRT müayinəsini göstərmək olar. Belə ki, MRT zamanı istifadə olunan maqnit sahəsi geomaqnit dəyişikliklərindən qat-qat güclü olsa da, orqanizmə zərər vurmur.
Kondraxin əlavə edib ki, belə dövrlərdə müşahidə olunan yorğunluq, yuxusuzluq və iş qabiliyyətinin azalması beynin ətraf mühitdəki dəyişikliklərə reaksiyası ilə bağlıdır. Orqanizm bunu stress kimi qəbul edir və enerjiyə qənaət rejiminə keçir.
"Hipertoniyadan əziyyət çəkən insanlarda orqanizmin dəyişikliklərə reaksiyası stress xarakteri daşıyır və nəticədə arterial təzyiq yüksəlir. Ürək-damar xəstəlikləri olan şəxslərdə də eyni proses baş verir. Orqanizm narahat şəraitə düşdüyü üçün ürək və damarlar buna reaksiya verir", - deyə həkim vurğulayıb.
Onun sözlərinə görə, bu reaksiyalar adətən ciddi təhlükə yaratmır, lakin xroniki xəstəlikləri olan insanlarda nəzərəçarpacaq narahatlıq yarada bilər.
