Rusiya prezidentinin davamlı inkişaf məqsədlərinə nail olmaq üçün beynəlxalq təşkilatlarla əlaqələr üzrə xüsusi nümayəndəsi Boris Titov Rusiyanın Ermənistanın kənd təsərrüfatı məhsullarını Azərbaycandan gələn tədarüklərlə əvəzləmək niyyətində olduğunu bəyan edib.
O, müvafiq bəyanatla Sankt-Peterburq Beynəlxalq İqtisadi Forumu çərçivəsində çıxış edib.
"Ermənistanla itirdiyimizi Azərbaycanla əvəzləyəcəyik, çünki kənd təsərrüfatı sahəsində Azərbaycanın Ermənistandan daha çox şeyə qadir olduğu və daha çox məhsul verdiyi tamamilə aydındır", - deyə Titov vurğulayıb.
Onun qiymətləndirməsinə görə, Azərbaycanın aqrar sektoru daha yüksək potensiala malikdir və böyük həcmdə tədarükü təmin etmək iqtidarındadır, bu isə mövcud şəraitdə onu Rusiya tərəfi üçün daha üstün tərəfdaşa çevirir.
Ermənistanın Avropa İttifaqına mümkün daxil olmasının nəticələrini şərh edən Titov qeyd edib ki, bu addım respublika əhalisi üçün ciddi iqtisadi sarsıntılara səbəb olacaq. Digər amillərlə yanaşı, o, iqtisadi qeyri-sabitlik və qiymətlərin artacağını proqnozlaşdırıb.
Kreml nümayəndəsinin sözlərinə görə, mənfi dəyişikliklər Ermənistan dövlətinin demək olar ki, bütün həyat sahələrinə təsir edəcək. (Oxu.az)
