NATO ölkələri Rusiyaya qarşı müqaviməti gücləndirmək məqsədilə İsveçə məxsus strateji adanı hərbi bazaya çevirmək qərarı verib.
Bu barədə “Politico” nəşri məlumat yayıb.
Söhbət Baltik dənizində yerləşən və Kalininqraddan təxminən 300 kilometr məsafədə olan Qotland adasından gedir. Alyans ölkələri bölgədə artdığı iddia edilən Rusiya təhlükəsi fonunda adanı hərbi plasdarma çevirməyi planlaşdırır.
Bildirilir ki, bundan əvvəl adada NATO ilə birgə İsveç Silahlı Qüvvələrinin genişmiqyaslı hərbi təlimləri keçirilib. Təlimlərdə 13 ölkədən ümumilikdə 18 minə yaxın hərbçi iştirak edib.
Şimali Atlantika Alyansına üzv ölkələr hesab edir ki, Qotlandda yaradılacaq hərbi baza Baltik dənizinin böyük hissəsinə nəzarət etməyə imkan verəcək. Məqsədin Rusiyanın bölgədəki təsir imkanlarını zəiflətmək olduğu vurğulanır.
