İngiltərənin Nottingem Universitetində aparılan yeni araşdırma, geniş şəkildə istifadə olunan parasetamolun bəzi yaş qruplarında təhlükəli təsirlərə səbəb ola biləcəyini üzə çıxarıb.
Reseptsiz satılan və tez-tez baş ağrısı, qızdırma və qrip simptomları zamanı istifadə edilən bu dərman, uzunmüddətli istifadədə sağlamlığa ciddi zərər vura bilər.
Tədqiqatçılar 65 yaşdan yuxarı insanlarda müntəzəm parasetamol qəbulunun ürək, mədə və böyrək problemləri riskini əhəmiyyətli dərəcədə artırdığını bildiriblər. Araşdırmaya 180 mindən çox pasiyent daxil edilib və nəticələr göstərib ki, ürək çatışmazlığı, yüksək təzyiq, mədə xorası və böyrək xəstəliyi kimi fəsadlar daha çox uzun müddət istifadə edənlərdə müşahidə olunur.
Professor Weiya Zhang bildirib:
"Parasetamol uzun illərdir təhlükəsiz hesab olunur, lakin yaşlı pasiyentlərdə ağırlaşma riski daha yüksəkdir. Buna görə də, uzunmüddətli istifadəyə yenidən baxılmalıdır."
Mütəxəssislər xəbərdarlıq edir ki, tövsiyə olunan gündəlik doza keçilməməlidir. Qaraciyər və ya böyrək xəstəliyi olanlar, həmçinin çəkisi 50 kiloqramdan az olan şəxslər parasetamolu yalnız həkim məsləhəti ilə qəbul etməlidirlər.
NHS (Böyük Britaniyanın Milli Səhiyyə Xidməti) isə bildirir ki, parasetamol qısamüddətli ağrılar üçün təhlükəsiz hesab olunsa da, xroniki ağrılar zamanı yalnız həkim nəzarəti altında istifadə edilməlidir.
