Gəncə-Daşkəsən Regional Təhsil İdarəsinin müdiri Elçin Kərimov cari ildə fəaliyyətə başlayan tərbiyəçi-müəllimlər və musiqi rəhbərləri ilə tanışlıq və maarifləndirici xarakterli görüş təşkil olunub.
Görüşdə idarə müdiri yeni təyinat alan əməkdaşları təbrik edərək onlara gələcək fəaliyyətlərində uğurlar arzulayıb. O, qeyd edib ki, təhsil sistemində tərbiyəçi-müəllimlərin və musiqi rəhbərlərinin rolu xüsusilə əhəmiyyətlidir. Erkən yaş dövründə uşaqlarda mənəvi-əxlaqi dəyərlərin formalaşması, estetik zövqün inkişafı və yaradıcı qabiliyyətlərin üzə çıxarılması bu mütəxəssislərin peşəkar yanaşmasından asılıdır.
Elçin Kərimov çıxışında vurğulayıb ki, son illər təhsilin inkişafı istiqamətində mühüm islahatlar həyata keçirilir və bu prosesdə pedaqoji heyətin rolu əvəzsizdir. O, yeni təyinat alan əməkdaşlara qarşı qoyulan gözləntiləri ifadə edərək, etik davranış, pedaqoji məsuliyyət və fərdi inkişaf məsələlərinə xüsusi diqqət yetirməyi tövsiyə edib.
Görüş zamanı pedaqoqlar arasında fikir mübadiləsi aparılıb, onları maraqlandıran suallar cavablandırılıb və vəzifə öhdəlikləri ilə bağlı vacib məlumatlar verilib.
Qeyd edək ki, GDRTİ tərəfindən belə maarifləndirici görüşlərin təşkili pedaqoji kadrların adaptasiyasını asanlaşdırmaq, onların peşəkar fəaliyyətində dəstək göstərmək və ümumi təhsil mühitinin keyfiyyətini artırmaq məqsədi daşıyır.
