İyulun 29-da İsmayıllı Rayon İcra Hakimiyyəti, Qərbi Azərbaycan İcmasının birgə təşkilatçılığı ilə Qərbi Azərbaycana həsr olunan kitabın təqdimat mərasimi keçirilib.
Heydər Əliyev Mərkəzində “Qərbi Azərbaycan İrsi: Ermənistanda azərbaycanlılara məxsus qəbiristanlıqların sistemli qaydada dağıdılmasının nəticələri və beynəlxalq hüquqi məsuliyyətə dair” hesabat və materiallar kitabının I cildi təqdim olunub.
Tədbirdə Rayon İcra Hakimiyyətinin məsul əməkdaşı Nəsimi Teymurov, Qərbi Azərbaycan icmasının aparatının əməkdaşı Əhməd Rzayev, Baran icmasının Osman Hacıyev, Qərbi Azərbaycan İsmayıllı rayon icmasının sədri Vidadi Mamedov, rayonda yaşayan Qərbi Azərbaycanlılar, ağsaqqallar, ziyalılar, təhsil işçiləri iştirak edib.
İlk olaraq tədbir iştirakçıları Ümummilli lider Heydər Əliyevin abidəsi önünə gül dəstələri düzərək əziz xatirəsini dərin ehtiramla yad ediblər. Daha sonra qonaqlar Qərbi Azərbaycana həsr olunmuş fotosərgi və “Qərbi Azərbaycan Təravəti” adlı Azərbaycan brendinin istehsal etdiyi məhsullarla tanış olublar. Azərbaycanın Dövlət Himni səsləndirildikdən sonra Ümummilli lider Heydər Əliyevin və ölkəmizin azadlığı və ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.
“Qərbi Azərbaycan irsi” silsilə nəşri ilə bağlı hazırlanmış videoçarx nümayiş olunduqdan sonra tədbiri giriş nitqi ilə açan İsmayıllı Rayon İcra Hakimiyyətinin əməkdaşı Nəsimi Teymurov qeyd edib ki,1948-1953-cü il və 1988-ci illərdə Ermənistandan yüz minlərlə azərbaycanlı deportasiya edilib. Erməni vəhşiliyinin nümunələri təkcə soydaşlarımızın deportasiyasında özünü göstərmir. Yürüdülən etnik təmizləmə siyasəti nəticəsində Azərbaycanın etnik mənsubiyyətinə xas olan yaşayış məntəqələrinin, coğrafi məkanların adları saxta erməni toponimləri ilə dəyişdirilib, tarixi abidələri məhv edilib.
Çıxış edənlər Ümummilli Lider Heydər Əliyevin azərbaycanlıların Qərbi Azərbaycandan kütləvi deportasiyasına ilk hüquqi-siyasi qiymət verdiyini, Azərbaycan Prezidenti İlham Əliyevin rəhbərliyi ilə bu gün Qərbi Azərbaycanla bağlı həqiqətlərin araşdırılması və dünya ictimaiyyətinə çatdırılmasının dövlət siyasətinin əsas istiqamətlərindən biri olduğunu vurğulayıblar. Əziz Ələkbərli və tədqiqatçı-alim Səbuhi Hüseynovun müəllifliyi ilə hazırlanmış “Qərbi Azərbaycan İrsi: Ermənistanda azərbaycanlılara məxsus qəbiristanlıqların sistemli qaydada dağıdılmasının nəticələri və beynəlxalq hüquqi məsuliyyətə dair” hesabat və materiallar adlı kitabın tarixi yaddaşın qorunmasında mühüm rol oynadığını diqqətə çatdırıblar.
