2 İyul tarixi Azərbaycan hüquq-mühafizə orqanlarının tarixində xüsusi yer tutur. Bu gün ölkəmizin müstəqilliyinin, sabitliyinin və daxili təhlükəsizliyinin təmin olunmasında müstəsna xidmətləri olan Azərbaycan polisinin peşə bayramıdır. 1918-ci ildə Azərbaycan Xalq Cümhuriyyəti dövründə əsası qoyulan milli polis qurumu, bu gün müasir dövlətçiliyimizin ayrılmaz dayaqlarından birinə çevrilmişdir.
Azərbaycan polisi dövlətçiliyə sadiq, Vətənə bağlı və xalqına ləyaqətlə xidmət edən peşəkar bir sistemdir. Ölkədə ictimai asayişin qorunması, cinayətkarlığa qarşı mübarizə, vətəndaşların hüquq və azadlıqlarının müdafiəsi məhz bu güclü və çevik təşkilatın gündəlik vəzifəsidir. Təkcə gündəlik fəaliyyətlə deyil, Vətən müharibəsində də Azərbaycan polisi ön cəbhədə igidlik göstərərək, əsgər və zabitlərimizlə birgə torpaqlarımızın azadlığı uğrunda fədakarcasına mübarizə aparmışdır.
Daxili İşlər Nazirliyinin rəhbərliyi altında fəaliyyət göstərən bütün polis əməkdaşları daim inkişafda olan peşəkarlıq, texnoloji təminat və vətəndaş məmnuniyyəti prinsipini əsas tutaraq xidmət göstərirlər. Bugünkü Azərbaycan polisi – müasir, güclü, vətəndaşa yaxın və xalqın inamına layiq bir qurumdur.
2 İyul – Azərbaycan Polisi Günü münasibətilə bütün polis əməkdaşlarını təbrik edir, onlara möhkəm cansağlığı, əzm, dözüm və Vətənə sədaqətlə xidmətlərində davamlı uğurlar arzulayırıq. Yaşasın Azərbaycan Polisi! Yaşasın müstəqil Azərbaycan!
Səfər Əlirzayev,
Xeyriyyəçi- İş adamı
