Son illər Azərbaycanın təhsil sistemində aparılan islahatlar arasında sertifikasiya prosesi mühüm yer tutur. Bu proses ilk baxışda bir sadə imtahan kimi görünsə də, əslində müəllim əməyinə verilən dəyərin, etimadın və təşəkkürün ifadəsidir. Çünki sertifikasiya – müəllimin yalnız biliyini deyil, həm də onun pedaqoji yanaşmasını, peşəkar mövqeyini və inkişaf potensialını üzə çıxaran ədalətli bir qiymətləndirmə mexanizmidir.
Ənənəvi sistemlərdə müəllimlərin biliyi illərlə eyni səviyyədə qəbul olunur, onların inkişafına və yenilənməsinə ehtiyac olub-olmadığı nəzərə alınmırdı. Lakin müasir təhsil modeli dinamikdir – burada müəllim daimi öyrənməli, yenilənməli və öz üzərində işləməlidir. Sertifikasiya bu yanaşmanı dəstəkləyir və stimullaşdırır.
Bu sistemin ən önəmli tərəfi isə onun müəllimə verdiyi dəyəri rəsmi şəkildə tanımasıdır. Sertifikasiyadan uğurla keçən müəllim yalnız mənəvi baxımdan deyil, maddi baxımdan da mükafatlandırılır. Əməkhaqqında edilən diferensial artımlar göstərir ki, dövlət, müəllimin öz üzərində çalışmasını qiymətləndirir və bu zəhməti qarşılıqsız qoymur.
Təhsilin təməlində müəllim dayanır. Güclü müəllim – güclü gələcək deməkdir. Sertifikasiya isə bu gücü aşkarlayan və önə çıxaran ən mühüm vasitələrdən biridir. Bu gün müəllimlər bilirlər ki, onların əziyyəti ölçülür, bacarıqları dəyərləndirilir, səsi eşidilir.
Beləliklə, sertifikasiya yalnız bir imtahan deyil – bu, Azərbaycan müəlliminə verilən ən böyük dəyər, onun peşəsinə olan etimadın, sayğının və gələcəyə olan inamın təcəssümüdür.
Ülvi Osmanlı
Gənc Azərbaycan Dili və Ədəbiyyatı Müəllimləri Birliyinin sədri
