Azərbaycan xalqı hər il 28 May tarixini böyük fəxarət və qürurla qeyd edir. Bu gün Azərbaycanın müasir tarixində xüsusi yer tutan, Azərbaycan Xalq Cümhuriyyətinin (AXC) yaradıldığı gündür. 1918-ci ilin 28 mayında Tiflisdə Müsəlman Şərqində ilk parlamentli respublika olan AXC elan edildi və Azərbaycan xalqı ilk dəfə olaraq öz müstəqil dövlətinə sahib oldu.
Azərbaycan Xalq Cümhuriyyəti cəmi 23 ay mövcud olsa da, bu qısa müddətdə dövlət quruculuğu sahəsində böyük işlər görüldü. Parlament təsis olundu, milli ordu yaradıldı, ilk konstitusiya sənədləri qəbul edildi, dövlət dili Azərbaycan dili elan edildi. Eyni zamanda qadınlara seçki hüququ verilərək, Azərbaycan bu hüququ tanıyan ilk müsəlman ölkəsi oldu.
1920-ci ildə sovet işğalı nəticəsində fəaliyyətini dayandırsa da, AXC-nin ideyaları 1991-ci ildə müstəqilliyini yenidən bərpa edən Azərbaycan Respublikasının əsasını təşkil etdi. Bu günkü müstəqil Azərbaycanın kökləri məhz 28 may 1918-ci ilə dayanır.
Prezident İlham Əliyev dəfələrlə vurğulayıb ki, müasir Azərbaycan dövləti AXC-nin siyasi varisidir və bu tarixi irsi qorumaq və inkişaf etdirmək hər bir vətəndaşın borcudur.
Bu gün 28 May – Respublika Günü artıq təkcə keçmişin xatırlanması deyil, müstəqilliyin qorunması, dövlətçiliyin möhkəmləndirilməsi və milli kimliyin təntənəsi günüdür. Azərbaycanın işğaldan azad olunmuş ərazilərində, o cümlədən Laçında, Şuşada və digər şəhərlərdə bu gün daha böyük sevgi və inamla qeyd olunur.
28 May – bizim dövlətçiliyimizin başlanğıcı, xalq iradəsinin təntənəsi və azadlıq uğrunda mübarizənin rəmzidir. Bu gün tariximizi xatırlamaqla yanaşı, gələcəyə daha möhkəm iradə ilə baxmalı, müstəqil dövlətimizin inkişafı üçün birgə çalışmalıyıq.
Yaşasın Azərbaycan Respublikası! Yaşasın 28 May Respublika Günü!
Səfər Əlirzayev,
Xeyriyyəçi- İş adamı
