Şəki-Zaqatala Regional Təhsil İdarəsinin tabeliyində fəaliyyət göstərən ümumtəhsil məktəblərinin 8-10-cu sinif şagirdləri arasında “Konstitusiya və Suverenlik ili”nə həsr olunmuş intellektual məktəb çempionatının rayon-şəhər mərhələsi keçirilib.
Məktəbəqədər və Ümumi Təhsil üzrə Dövlət Agentliyinin direktorunun müvafiq əmri ilə təşkil olunmuş çempionatın keçirilməsində əsas məqsəd gənclərin intellektual və yaradıcılıq bacarıqlarının inkişafına kömək etmək, yüksək yaradıcılıq qabiliyyətinə, intellektual potensiala və müxtəlif sahələrdə dərin biliklərə malik gəncləri aşkar etmək, onların inkişaf etdirilməsinə şərait yaratmaq, respublikanın müxtəlif regionlarında ən güclü məktəb komandalarını müəyyən etmək, məktəblilərin intellektual və yaradıcılıq səviyyəsinin yüksəldilməsinə nail olmaqdır.
Qeyd edək ki, rayon və şəhər mərhələsinin qalibi olmuş komandalar mayın 17-də Şəki şəhərində keçiriləcək region mərhələsində öz rayonlarını təmsil edəcəklər.
#EduAz #ŞəkiZaqatalaRTİ #Çempionat
