Azərbaycanda maaşların və pensiyaların artmasından sonra insanları maraqlandıran əsas məsələlərdən biri əlilliyə görə verilən müavinətlərin artıb-artmaması ilə bağlıdır.
Mövzu ilə bağlı Milli Məclisin deputatı, iqtisadçı Vüqar Bayramov açıqlamasında bildirib ki, Azərbaycan Prezidentinin imzaladığı 23 dekabr 2024-cü il tarixli sərəncama əsasən, sosial müavinətlər və təqaüdlərin artırılması da nəzərdə tutulur:
"Belə ki, sosial müavinətlər və təqaüdlərin artırılması ilə bağlı Prezident tərəfindən Nazirlər Kabinetinə 3 ay vaxt verilib və sərəncamın imzalandığı gündən 3 ay ərzində Nazirlər Kabineti təkliflərini hazırlayıb dövlət başçısına təqdim etməlidir. Daha sonra da, təbii ki, Prezident tərəfindən sosial müavinətlərin və təqaüdlərin artırılması ilə bağlı qərar qəbul ediləcək. Azərbaycanda sosial müavinətlər və təqaüdlərin artırılması ilə bağlı dövlət başçısı tərəfindən tapşırıq olduğuna görə bu istiqamətdə artımlar olacaq".
Deputat qeyd edib ki, Nazirlər Kabineti tərəfindən təkliflərin mart ayının ikinci yarısında təqdim olunacağı və daha sonra dövlət başçısı tərəfindən artımla bağlı sənədin imzalanması gözlənilir.
"Əlilliyə görə ödənilən sosial müavinət, bötövlükdə müavinət növlərindən biridir. Nəzərə alsaq ki, sözügüdən sərəncamla sosial müavinətlər və təqaüdlərin artırılması ilə bağlı Nazirlər Kabinetinə tapşırıq verilib, bu baxımdan, artıq Nazirlər Kabineti tərəfindən təkliflər təqdim olunduqdan sonra hansı istiqamətdə artımların olacağı və artım faizlərinin nə qədər olacağı bəlli olacaq.
Sözsüz ki, biz əlilliyə görə verilən müavinətin artırılması ilə bağlı da təkliflərimizi təqdim etmişik. Bu istiqamətdə maliyyə qiymətləndirilməsi və Nazirlər Kabineti tərəfindən təkliflər hazırlandıqdan sonra məhz hansı müavinətlərdə artımların olması və artım faizləri bəlli olacaq. Bütövlükdə biz sosial paketin növbəti mərhələsində sosial müavinətlər və təqaüdlərdə artımları müşahidə edəcəyik", - deyə V.Bayramov əlavə edib.
