Rusiya Prezidenti Vladimir Putin və ABŞ-ın yeni seçilmiş prezidenti Donald Tramp arasında danışıqların əsas məqsədi NATO qoşunlarının şərq sərhədlərində geri çəkilməsini müzakirə etmək ola bilər.
Bu barədə “Financial Times” mənbələrə istinadla məlumat yayıb.
Nəşr iddia edir ki, Putin Ukraynanın heç vaxt Şimali Atlantika Alyansına qoşulmamasını və NATO-nun şərqdəki mövcudluğunu azaltmasını təmin edəcək yeni sazişlər bağlamağı planlaşdırır.
Nəşr vurğulayıb ki, Putin Rusiya üçün hər hansı təhlükənin qarşısını almaq məqsədi ilə dünya sistemini dəyişməyi planlaşdırır. İddia olunur ki, Putin Rusiya-Ukrayna münaqişəsi bitdikdən sonra yarana biləcək vəziyyətdən narahatdır.
Yanvarın 10-da Tramp jurnalistlər qarşısında çıxışı zamanı deyib ki, Putin onunla görüş keçirməkdə maraqlıdır və hazırda ona hazırlıq gedir. ABŞ-ın seçilmiş prezidenti görüşün tarixini dəqiqləşdirməyib. O, tədbirin keçirilmə yeri və Çin Sədri Si Cinpinin mümkün iştirakı ilə bağlı suallara cavab verərək deyib ki, təfərrüatlar daha sonra məlum olacaq və inauqurasiya gününə qədər gözləməliyik.
Dekabrın 19-da Putin birbaşa xətt zamanı Trampla görüşə hazır olduğunu bildirsə də, tarixi dəqiqləşdirməyib. Tramp daha sonra cavab verib ki, Ukraynadakı münaqişənin həlli ilə bağlı Rusiya lideri ilə görüşü gözləyəcək.
