ABŞ-ın artıq Türkiyənin Rusiyadan aldığı "S-400" hava hücumundan müdafiə sistemlərindən istifadə etməsinə etirazı yoxdur.
Bunu Türkiyə Müdafiə Nazirliyinin rəhbəri Yaşar Gülər deyib.
"Amerika tərəfi ilə son görüşlərimiz zamanı onların "S-400" kontekstində bizdən istədiklərini rədd etdik. İndi amerikalıların buna etirazı yoxdur", - deyə o bildirib.
Nazirin sözlərinə görə, Türkiyə tərəfi "S-400"lərin istifadə olunacağı əraziləri müəyyənləşdirib. O qeyd edib ki, hava hücumundan müdafiə sistemi istifadə olunmazdan təxminən 12 saat əvvəl yerləşdiriləcək.
Türkiyə 2019-cu ildə aldığı "S-400" alay dəstinin tədarükü üçün 2017-ci ildə Rusiya ilə müqavilə bağlayıb. Eyni zamanda ABŞ Rusiya sistemlərindən "Patriotun" xeyrinə imtina edilməsini tələb etsə də, Ankara bununla razılaşmayıb. Bundan sonra ABŞ Türkiyəni ən son "F-35" qırıcılarının tədarükü proqramından kənarlaşdırıb.
Sentyabrda Türkiyənin “Cumhuriyet” qəzeti yazıb ki, Türkiyə qırıcı təyyarələrin satışı müqabilində S-400 sistemlərindən istifadə etməmək niyyəti barədə ABŞ-a məlumat verib. Ankaranın S-400-ləri Pakistan və Hindistana da sata biləcəyi bildirilir .
