Ağstafa rayon Mədəniyyət Mərkəzində Zəfər Gününə həsr edilmiş "Bu Zəfərin mübarəkdir, ey Vətən! " adlı tədbir təşkil edilib.
Tədbirdə Ağstafa rayonu üzrə təhsil sektorunun əməkdaşları, Uşaq-Gənclər İnkişaf Mərkəzinin və ümumi təhsil müəssisələrinin pedaqoji kollektivi, valideynlər və şagirdlər iştirak ediblər.
Tədbirdə şəhidlərin əziz xatirəsi bir dəqiqəlik sükutla yad edilib, Azərbaycanın müasir tarixində fəxarətlə, qürurla anılan Zəfər Günü barədə şagirdlərə ətraflı məlumat verilib. Ali Baş Komandan İlham Əliyevin Azərbaycan dövlətini şanlı qələbəyə aparan daxili və xarici siyasəti, Azərbaycan Ordusunun zəfər yürüşü və bununla da dünya hərb tarixindəki yeri barədə söhbət açılıb.
Tədbirdə şagirdlər Azərbaycana, vətənpərvərliyə həsr edilən şeirlər söyləyiblər. Maraqlı kompozisiyalar, rəqslər nümayiş etdiriblər, mahnılar səsləndiriblər.
