Seçki Qərargahından verilən məlumata görə sentyabr ayının 1-də Milli Məclisə keçiriləcək seçkilərdə 89 saylı Seçki Dairəsindən namizədliyi qeydə alınmış Novruzəli Davud oğlu Aslanov ( Novruz Aslan) təbliğat planına uyğun olaraq avqustun 23 də İsmayıllı rayon Mədəniyyət Sarayında İsmayıllının şəhər sakinləri ilə görüşü oldu. Görüşdən qabaq Novruz Aslan, vəkilləri və qərargah üzvləri ilə birlikdə rayon mərkəzində Ulu Öndər Heydər Əliyevin abidəsini ziyarət etdilər.
Görüş Dövlət Himnimiz səsləndirilməsi ilə başladı. Şəhidlərimizin ruhu bir dəqiqəlik sükutla yad edildi. Novruz Aslan görüşə gələn həmyerlilərini salamladı və öz platformasından danışdı. Vətən müharibəsində, Qisas əməliyyatında və 1 günlük antiterror əməliyyatlarında canlarını fəda edən Şəhidlərimizin və Qazilərimizin keçdiyi şərəfli ömür yolundan və Qalib ölkəmizin regionda və dünyadakı nüfuzundan danışdı. Görüşdə iştirak edən Əməkdar İncəsənət Xadimi Baba Vəziroğlu, yazıçı-jurnalist Xeyrulla Dəniz, bədii qiraətçi Pünhan İsmayıllı çıxış edərək Novruz Aslanın rayonumuz və ölkəmiz qarşısındakı xidmətlərindən danışdı. Sonra seçicilərlə Novruz Aslanın səmimi söhbəti oldu. İsmayıllı şəhər sakinləri onları maraqlandıran sualları verərək yaşadıqları rayonun qayğılarından danışdılar. Sonda görüşə gələn rayon sakinləri çıxış edərək onlara göstərilən diqqətə görə Novruz Aslana təşəkkürlərini bildirdilər. Məlumat üçün bildirək ki, təbliğat kompaniyası avqustun doqquzundan başlayıb bu Novruz Aslanın qırx beşinci görüşüdür. Novruz Aslanın bu gün üçün ilk görüşüdür.
