Nyu Yorkda “My Way” (Mənim Yolum) Yaradıcılıq İnkişafı Mərkəzi tərəfindən təşkil edilən İpək Yolu Festivalı (Silk Road Festival) keçirilib.
Azərbaycan, Gürcüstan, Monqolustan, Rusiya, Ukrayna və digər ölkələrdən qatılan 175 iştirakçı öz ölkələrinin mədəniyyətini təqdim ediblər.
Tədbiri giriş sözü ilə açan “My Way” Yaradıcılıq İnkişafı Mərkəzinin rəhbəri Alyona Bədəlova festival iştirakçılarına uğurlar arzulayıb.
Peşəkar sənətçilərin və uşaqların qatıldığı festivalda Azərbaycanı Fərizə Dudarovanın rəhbərliyi ilə “Qafqaz Ritmləri" rəqs qrupu “Yallı” və “Tərəkəmə” rəqsləri ilə təmsil edib. Tamaşaçılar iştirakçıların ifalarını böyük maraq və alqışlarla qarşılayıblar.
Tədbir çərçivəsində “My Way” Yaradıcılıq İnkişafı Mərkəzinin incəsənət məsələləri üzrə direktoru, istedadlı pedaqoq, heykəltəraş və rəssam Emin Quliyevin “İpək Yolu Səyahəti” İncəsənət Layihəsi təşkil edilib. Layihə çərçivəsində 4-24 yaş arası olan 276 uşaq və gənc “Ən yaxşı rəsm” yarışı keçirilib.
Qeyd edək ki, Nyu Yorkda artıq 5-ci ildir təşkil olunan festival İpək Yolu marşrutuna daxil olan ölkələrin mədəniyyətini nümayiş etdirir. Bu il təşkilatçılar sırasına Diana Bagrationi Fondu və “Şambala” Tibet-Buddist Mərkəzi kimi müəssisələr də qoşulub.
Nyu-Yorkda şəhər sakinləri arasında tanınan festivalın iştirakçıları şəhər meriyası və yerli ictimai xadimlər tərəfindən mükafatlandırılıb.
