Diasporla İş üzrə Dövlət Komitəsinin sədri Fuad Muradov Almaniyada yaşayan tanınmış alim, Azərbaycan Respublikasının Əməkdar elm xadimi, fizika-riyaziyyat elmləri doktoru, professor Məsud Əfəndiyevlə görüşüb.
Komitə sədri professor Məsud Əfəndiyevin uzun illər Almaniyada yaşamasına baxmayaraq, daim vətəninin, xalqının inkişafı üçün çalışdığını diqqətə çatdırıb və Azərbaycan diasporunun inkişafındakı xidmətlərindən, riyaziyyat elmində əldə etdiyi uğurlardan söz açıb. Hazırda xaricdə fəaliyyət göstərən Azərbaycan icmalarının, soydaşlarımızın Prezident İlham Əliyevin və Birinci vitse-prezident Mehriban xanım Əliyevanın diqqətində olduğunu bildirib. Daha sonra Azərbaycan Respublikasının Prezidenti cənab İlham Əliyevin sərəncamı ilə Məsud Əfəndiyevin təltif olunduğu “Heydər Əliyevin 100 illiyi (1923-2023)” yubiley medalını alimə təqdim edib.
Fəaliyyətinə verilən yüksək qiymətə görə Azərbaycan dövlətinə dərin minnətdarlığını ifadə edən Məsud Əfəndiyev bundan sonra da xaricdə vətənimizin milli maraqlarının müdafiəsi, ölkə daxilində və hüdudlarından kənarda təhsil alan, yaşayan gənclərimizin beynəlxalq elm aləminə inteqrasiyası, fəallıqlarının arıtırılması üçün əlindən gələni əsirgəməyəcəyini söyləyib.
Qeyd edək ki, Məsud Əfəndiyev 1996-cı ildə “Alexander von Humboldt Fondu”nun gənc alimlər üçün olan mükafatına və 2015-ci ildə “Fellowship for Experienced Researchers” mükafatına layiq görülmüs ilk və yeganə azərbaycanlı alimdir.
Torontoda yerləsən Fields İnstitutunun və Toronto Universitetinin birgə təsis etdiyi (2018) “Dean`s Distinguished Professor” (Dekanın görkəmli professoru) statusunda 6 ay ərzində “Mathematical Biology Thematik” proqramına rəhbərlik edib. 2023-cü ildə Fields İnsititutunun “Lifetime Achievements Award” ömürlük mükafatına layiq görülüb.
