Mədəniyyət Nazirliyinin dəstəyi, "Miras" mədəni irsin öyrənilməsinə kömək İctimai Birliyinin təşkilatçılığı ilə Ağsu rayonu Gəgəli kəndində 1-2 iyun tarixlərində keçirilən tədbirdə İsmayıllı rayonundan "Lahıc" Xalq folklor kollektivi və Teymur Əzizin, Ağsu rayonundan “Aşıqlar” ansamblının bədii rəhbəri Amil Dadaşovun, Qobustan rayonundan balaban ifaçısı Baxış Binyətovun, Şamaxı rayonundan Aşıq Rzanın, səhnə moderatoru Ruslan Adgözəlovun, musiqiçilər Nizami Camallı, Cahid Mikayılov, Fariz Mikayılov, Elsəvər Rəsulovun çıxışı maraqla qarşılanıb.
Festivalda Azərbaycandan olan folklor kollektivləri ilə bərabər Türkiyə, İtaliya, Gürcüstan və digər dövlətlərdən dəvət olunmuş xalq ansamblları, folklor və xor kollektivləri də iştirak edib.
Festival çərçivəsində rəsm əsərləri, dekorativ-sənətkarlıq nümunələri, kənd məhsullarından ibarət sərgi-yarmarka təşkil edilib. Tanınmış rəssamlar, heykəltaraşlar, el sənətkarları, idman ustalarının ustad dərsləri keçirilib. Eyni zamanda kəndirbazlar, zorxana, oxatma, çilingağac kimi milli oyunlar da nümayiş olunub.
Festivalın keçirilməsi tərəkəmə həyat tərzinin və köç yollarının UNESCO siyahısına alınması ilə səsləşir. Tədbir təşkilatçılarının əsas hədəfi festivalın davamlı olması və UNESCO-nun ilkin qeyri-maddi mədəni irs siyahısına daxil edilməsidir.
