Mayın 22-də Mərkəzi Aran Regional Mədəniyyət İdarəsinin dəstəyi, Kürdəmir rayon Mədəniyyət Mərkəzinin təşkilatçılığı ilə ənənəvi Folklor Festivalı keçirilib.
Kürdəmir rayon Heydər Əliyev adına parkda keçirilən festivalda Mərkəzi Aran Regional Mədəniyyət İdarəsinin rəhbərliyi, Kürdəmir Rayon İcra Hakimiyyətinin başçısı və əməkdaşları, idarə, müəssisə və təşkilatların, rayon ictimaiyyətinin nümayəndələri, hərbi qulluqçular, şəhid ailələri, qazilər, mədəniyyət müəssisələrinin əməkdaşları iştirak ediblər.
Folklor Festivalının keçirilməsində məqsəd zəngin sənət, incəsənət nümunələrini toplamaq, qorumaq, nümayiş etdirmək, gələcək nəsillərə çatdırmaq, mədəni irsin, zəngin dəyərlərin qorunmasına təşviq etməkdir.
Mərkəzi Aran Regional Mədəniyyət İdarəsinin əhatə etdiyi Mingəçevir şəhəri, Ağdaş, Göyçay, Ucar, Kürdəmir, Yevlax və Zərdab rayonlarından olan mədəniyyət müəssisələrinin əməkdaşlarının təqdimatında rəsm əsərlərinin, sənətkarlıq nümunələrinin, qədim məişət əşyalarının sərgisi, folklor ansambllarının, musiqi məktəblərinin şagirdlərinin ifasında musiqi nömrələri, aşıq sənəti, milli rəqslər və milli mətbəx nümunələri ilə zəngin olan festival rayon əhalisi və qonaqlar tərəfindən maraqla qarşılanıb.
