02 may 2024-cü il tarixdə İsmayıllı Rayon İcra Hakimiyyətinin, Dağlıq Şirvan Regional Gənclər və İdman İdarəsinin, İsmayıllı rayon Polis Şöbəsinin və Dini Qurumlarla İş üzrə Dövlət Komitəsinin Şamaxı şöbəsinin birgə təşkilatçılığı Qalınçaq kənd tam orta məktəbdə “Narkomaniyanın fiziki,mənəvi və sosial fəsadları” mövzusunda maarifləndirici tədbir keçirilib.
Tədbirdə İsmayıllı Rayon İcra Hakimiyyətinin nümayəndəsi Bəhruz Xələfov, Dini Qurumlarla İş üzrə Dövlət Komitəsinin Şamaxı bölgəsi üzrə şöbəsinin əməkdaşı Aydın Səmədov,İsmayıllı rayon Polis Şöbəsinin inspektoru, polis mayoru Rahim Orucov, Dağlıq Şirvan Regional Gənclər və İdman İdarəsinin rəis müavini Fərhad Qurbanov,Qalınçaq kənd tam orta məktəbinin direktoru, müəllimləri və məktəblilər iştirak ediblər.
Tədbirin keçirilməsində əsas məqsəd yeniyetmə və gəncləri zərərli vərdişlərdən uzaqlaşdırmaq, narkomaniyaya qarşı mübarizə aparmaq və bu mübarizəni uğurla həyata keçirmək, asudə vaxtlarını səmərəli təşkil edilməsi istiqamətində təklif və tövsiyələri nəzərə çatdırmaq olub.
İlk öncə Azərbaycanın ərazi bütövlüyü və müstəqilliyi uğrunda canlarını fəda etmiş igid Vətən oğullarının ruhu bir dəqiqəlik sükutla yad edilib.
Daha sonra tədbirdə çıxış edənlər öz nitqlərində qeyd etdilər ki, narkotik vasitələrin və psixotrop maddələrin qanunsuz dövriyyəsi və narkomaniya bu gün dünyanı narahat edən əsas problemlərdən biridir. Bu istiqamətdə hər bir vətəndaş, hər bir gənc həmrəy olmalı, mübarizəni uğurla davam etdirilməsi üçün ilk öncə özləri də bu vərdişlərdən kənar gəzərək sağlamlıqlarının qeydinə qalmalıdırlar.
Xalqımızın ümummilli lideri Heydər Əliyevin siyasətini davam etdirən dövlətimizin başçısı İlham Əliyevin yüksək elmi təfəkkürünün, uzaqgörənliyinin, yenilməz iradəsinin xalqın mübarizliyi ilə sıx vəhdəti nəticəsində ildən ilə daha da qüdrətlənən dövlətimiz narkomanlığa, eləcə də narkotik vasitələrin və psixotrop maddələrin qanunsuz dövriyyəsinə qarşı bu gün də uğurlu mübarizə aparır.
