Aprelin 3-dən Mərkəzi Aran Regional Təhsil İdarəsinin tabeliyində fəaliyyət göstərən ümumi təhsil müəssisələrində çalışan psixoloqlar üçün "Psixoloji xidmətin təşkili və effektivliyinin artırılması”na həsr olunan təlim-seminar keçirilir.
Mingəçevir şəhər N.Ahəngari adına 13 nömrəli tam orta məktəbdə keçirilən seminarda Mərkəzi Aran Regional Təhsil İdarəsinin müdir müavini Cavad Cavadov, Mingəçevir şəhəri üzrə təhsil sektorunun müdiri Sevinc Həsənova, Yevlax rayonu üzrə təhsil sektorunun müdiri Namidə Abbasova, Bakı Şəhəri üzrə Təhsil İdarəsinin nəzdində fəaliyyət göstərən Təlimə Dəstək Mərkəzinin psixoloji xidmətin təşkili bölməsinin rəhbəri Səidə Əhmədova və 250-ə yaxın məktəb psixoloqu iştirak edib.
Təlim-seminarın keçirilməsində məqsəd məktəb psixoloqlarının peşəkarlıq səviyyəsinin yüksəldilməsi, təhsil müəssisəsində sağlam mənəvi-psixoloji mühitin formalaşdırılması və psixoloji xidmətin təşkili və effektivliyinin artırılmasından ibarətdir.
Fərdi və qrup şəklində keçirilən seminar zamanı ilk olaraq, psixoloji xidmətin təşkili üçün müvafiq sənədlər toplusunun hazırlanması məsələləri və tətbiqi müzakirə edilib. Daha sonra psixoloqun fəaliyyət istiqamətlərinə dair təhsilalanların tədris mühitində diaqnostikası işinin aparılması, birinci sinif şagirdlərinin məktəbə adaptasiyası, şagirdlərlə inkişafetdirici işin təşkili barədə səmərəli fikir mübadiləsi aparılıb.
Qeyd edək ki, 4-5 aprel tarixlərində isə bir qrup məktəb psixoloquna ümumi təhsil müəssisələrində psixoloq xidmət işin təşkili, ailə-təhsil müəssisəsi münasibətlərinin düzgün tənzimlənməsi, təhsil müəssisəsində təhlükəsiz və sağlam mühitin yaradılması və digər zəruri məsələrlə bağlı təlimlər keçirilir.
