Martın 14-də Qazax şəhər 1 nömrəli Uşaq Musiqi Məktəbi Novruz bayramı ilə əlaqədar "Fəsillərin gözəli" adlı konsert proqramı təqdim edib.
Qazax rayon Mədəniyyət Mərkəzində keçirilən tədbirdə Qazax-Tovuz Regional Mədəniyyət İdarəsinin rəisi Nurəddin Mehdiyev, mədəniyyət işçiləri iştirak edib.
Tədbirdə milli paltarlarla bəzənmiş məktəbin şagirdlərinin hazırladığı musiqili proqramın təqdimatı keçirilib. İfa olunan şən və oynaq mahnılar, rəqslər, Novruzun atributları olan Kosa, Keçəl və Bahar qızın söylədiyi təbriklər, şeirlər, eləcə də, yumurta döyüşü kimi xalq oyunları tədbir iştirakçıları tərəfindən maraqla qarşılanıb.
Tədbir bayramın tarixi dəyərini, xalqımızın adət-ənənələrini, Novruz rəmzlərini əks etdirən nümunələr, şagirdlərin hazırladıqları səhnəciklərlə davam etdirilib.
Sonda Qazax-Tovuz Regional Mədəniyyət İdarəsinin rəisi Nurəddin Mehdiyev iştirakçıları Novruz bayramının xalqımızın milli adət-ənənələrini özündə əks etdirən ən qədim bayramlardan olduğunu vurğulayaraq, kollektivə xoş arzularını çatdırıb.
