17-18 fevral 2024-cü il tarixlərində, İsmayıllı Olimpiya İdman Kompleksində Dağlıq Şirvan Regional Gənclər və İdman idarəsinin və Azərbaycan Karate Federasiyasının birgə təşkilatçılığı ilə Fudokan karate-do idman növü üzrə uşaqlar, yeniyetmələr və gənclər arasında fudokan nümayəndəliyinin açıq turniri keçirildi.
Turnir Dövlət Himnimizin sədaları altında açıq elan edildikdən sonra torpaqlarımızın azadlığı uğrunda canlarını fəda etmiş şəhidlərimizin əziz xatirəsi Bir dəqiqəlik sükutla yad edildi.
Yarışda Dağlıq Şirvan Regional Gənclər və İdman idarəsinin rəisi Taleh Salehov, Rayon İcra Hakimiyyətinin əməkdaşı Nəsimi Teymurov, İsmayıllı şəhər İƏD üzrə nümayəndəsi Əlişir Süleymanov, Federasiyanın nümayəndəsi Vüsal Abdullazadə, İsmayıllı OİK-in direktoru Xamis Bədəlov və digər qonaqlar iştirak edirdi.
Taleh Salehov və digər qonaqlar tədbir iştirakçıkarını salamladı, onlara uğurlar arzulayaraq ölkə prezidenti cənab İlham Əliyevin bütün sahələrə olduğu kimi idmana və idmançılara göstərdiyi diqqət və qayğıdan söz açdılar.
Tədbirin bədii hissəsində Azərbaycan Respublikasının Prezidenti tərəfindən "Tərəqqi" medalı ilə təltif olunmuş,Əməkdar mədəniyyət işçisi Sahibə Abdullayeva mahnılar ifa etmiş və " İvanovka" rəqs qrupu çıxış etmişdir.
Açıq turnirdə paytaxt Bakı ilə yanaşı Sumqayıt, Gəncə, Ağstafa, Tovuz, Şəmkir, Göyçay, Qubadlı, Zəngilan, Füzuli, İsmayıllı və bir çox rayonlardan olan 200 - dən çox idmançı iştirak edirdi.
Sonda qaliblər Azərbaycan Karate Federasiyasının diplom və medalları ilə təltif olundular.
