Şagird davranış qaydaları və valideyn-məktəb münasibətlərinin tənzimlənməsi ilə bağlı görüş
- - - - -
Fevralın 23-də Mərkəzi Aran Regional Təhsil İdarəsində ümumi təhsil müəssisələrində tətbiq olunan şagird davranış qaydaları və valideyn-məktəb münasibətlərinin tənzimlənməsi ilə bağlı görüş keçirilib.
Görüşdə Mərkəzi Aran Regional Təhsil İdarəsinin müdiri Elçin Kərimov, müdir müavini Cavad Cavadov, struktur bölmə rəhbərləri və əməkdaşları, 27 ümumi təhsil müəssisəsinin direktoru iştirak edib.
Təhsil İdarəsinin müdiri Elçin Kərimov şagird davranış qaydalarının təhsilalanların bir sıra hüquq və vəzifələrini təmin etmək məqsədilə ümumi təhsil müəssisəsində nizam-intizamı tənzimləyən qayda və prosedurları müəyyən etdiyini, həmçinin məktəb nüfuzunun artırılması işinə dəstək verdiyini bildirib.
O qeyd edib ki, bu qaydalara uşaqların fiziki təhlükəsizliyi, onların psixoloji sağlamlığı, məktəbdaxili münasibətlər, şagirdlər arasında münasibət və məktəb kollektivi ilə olan münasibət, əlverişli öyrənmə mühiti və Azərbaycanın milli-mənəvi dəyərlərini əks etdirən müvafiq məktəb mühiti daxildir.
Daha sonra görüşdə məktəbdaxili münasibətlər, əlverişli öyrənmə mühiti, şagirdlərin dərsə davamiyyəti, səmərəli məktəb mühiti haqqında da geniş müzakirələr aparılıb, müvafiq mövzularla bağlı verilən suallar cavablandırılıb.
