- - - - -
Yanvarın 31-də Mərkəzi Aran Regional Təhsil İdarəsinin tabeliyində olan məktəbəqədər təhsil müəssisələrinə tərbiyəçi-müəllim vəzifəsinə işə qəbul üzrə müsabiqənin növbəti müsahibə mərhələsi keçirilib.
Mərkəzi Aran RTİ-nin inzibati binasında keçirilən müsahibəyə işə qəbul üzrə müsabiqənin test imtahanı mərhələsinin nəticələrinə əsasən, topladığı bala görə müraciət edənlər arasında ən yüksək bal toplamış namizədlər dəvət olunub.
Müsahibə mərhələsində namizədlərin peşə keyfiyyətləri və psixoloji vəziyyəti komissiya tərəfindən yoxlanılır.
Qeyd edək ki, müsahibəni keçməyən və ya qeydiyyatdan keçib lakin müsahibəyə dəvət edilməyən namizədlər 1 (bir) il müddətinə gələcəkdə təşkil ediləcək müsahibələrə yenidən müraciət edə bilərlər.
Daha sonra təhsil idarəsinin müdiri Elçin Kərimov cari ildə məktəbəqədər təhsil müəssisələrində vakant olan tərbiyəçi vəzifəsinə yeni təyin olunan müəllimlərlə görüşüb. İdarə müdiri işə yeni təyin olunan gənc müəllimləri təbrik edib, onlara öz tapşırıqlarını verib və çalışdıqları peşədə məsuliyyətli olmağı bildirib.
