Şəki şəhərində şair Baba Vəziroğlunun 70 illiyinə həsr olunmuş ədəbi-bədii gecə keçirilib.
Bu gün M.F.Axundzadə adına Şəki şəhər Mədəniyyət Mərkəzinin tabeliyində fəaliyyət göstərən Səməd Vurğun adına şəhər Folklor Evində yazıçı şair Baba Vəziroğlunun 70 illiyi münasibətilə ”Səni sənə bağışladım” mövzusunda ədəbi-bədii gecə keçirilib.
Tədbirdə kitabxana işçiləri və 11 nömrəli Tam Orta Məktəbin şagirdləri iştirak edib. Əvvəlcə MKS-nin Uşaq şöbəsinin kitabxanaçısı İradə xanım Kərimova çıxış edərək şairin həyatı və yaradıcılığı haqqında geniş məlumat verib. Məktəblilər şairin şeirlərini səsləndiriblər. Daha sonra Bilqeyis Ələsgərova adına şəhər Folklor klubunun müdiri (müğənni) Sərdar Yunusov şairin sözlərinə bəstələnmiş mahnılar ifa edib. Tamaşaçılara xoş dəqiqələr bəxş edib.
Sonda Folklor Evinin direktoru Şahmar Əsədov tədbirdə fəal iştiraklarına görə tamaşaçılara minnətdarlıq bildirib. Şair Baba Vəziroğlunun yaradıcılığından bəhs edən sujetin nümayişi ilə tədbir başa çatıb.
