Azərbaycanın görkəmli dövlət və ictimai-siyasi xadimi Nəsib bəy Yusifbəylinin anadan olmasının 140 illiyi münasibətilə Azərbaycan İlahiyyat İnstitutu (Aİİ) və Azərbaycan “Türk Ocağı”nın təşkilatçılığı ilə “İstiqlal savaşında Nəsib bəy Yusifbəyli yolu” mövzusunda elmi konfransın materialları çap olunub.
Kitabın təqdimat mərasimində Aİİ rektoru, dosent Aqil Şirinov bildirib ki, XIX əsrin sonu–XX əsrin əvvəllərində Vətəninin taleyüklü məsələlərinin həlli və xalqının mənafeyinin qorunması ilə bağlı çiyinləri üzərinə böyük yük düşən görkəmli dövlət xadimlərimiz arasında Nəsib bəy Yusifbəylinin xüsusi yeri var.
Nəsib bəy Yusifbəylinin həyatını xalqına həsr edən şəxsiyyət olduğunu vurğulayan rektor onun qısa ömür yaşamasına baxmayaraq, böyük xidmətlər göstərdiyini qeyd edib. O, yaşadığı və fəaliyyət göstərdiyi dövrdə daim Azərbaycan mədəniyyəti, inkişafı yolunda dayanmadan səylə çalışıb.
Azərbaycan “Türk Ocağı”nın rəhbəri, tarix üzrə fəlsəfə doktoru Akif Aşırlı Azərbaycan tarixinin Milli Azadlıq Hərəkatında N.Yusifbəylinin oynadığı xüsusi roldan bəhs edib. N.Yusifbəylinin Xalq Cümhuriyyətinin başlıca simalarından biri olduğunu bildirən Akif Aşırlı onun Baş nazir və maarif naziri olduğu dönəmlərdəki fəaliyyətini yüksək qiymətləndirib.
Dövlət İdarəçilik Akademiyası (DİA) “Tarix” kafedrasının müdiri, dosent Firdovsiyyə Əhmədova Nəsib bəy Yusifbəylinin ictimai-siyasi, dövlətçilik fəaliyyətində istiqlalçılığın aparıcı xətt kimi mühüm yer tutduğunu bildirib.
Tarix elmləri doktoru, professor Nəsiman Yaqublu, siyasi elmlər üzrə fəlsəfə doktoru Qərənfil Xəlilova, filologiya üzrə fəlsəfə doktoru, dosent İlhamə Qəsəbova Nəsib bəy Yusifbəylinin parlament və mətbu fəaliyyəti, maarifçilik ideyaları, görkəmli dövlət xadiminin irsinin tarixi əhəmiyyəti barədə çıxış ediblər. Maarifçi ziyalının Cümhuriyyət dövründəki fəaliyyətini qeyd edərək, milli şüurun formalaşmasında əvəzsiz xidmətlərindən söhbət açıblar.
